ಸುದ್ದಿ ಸಂಗ್ರಹ ಚಿತ್ತಾಪುರ
ಜನರು ಅನೇಕ ಕೆಲಸಗಳು ಸುಲಭವಾಗಿ ಮಾಡಬಹುದು, ಆದರೆ ಸಮಾಜಮುಖಿ ಕಾರ್ಯ ಮಾಡುವುದು ಸುಲಭವಲ್ಲ ಎಂದು ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ರಮೇಶ ಮರಗೋಳ ಹೇಳಿದರು.
ಪಟ್ಟಣದಲ್ಲಿ ದಿಗ್ಗಾಂವಕರ್ ಎಜ್ಯುಕೇಷನ್ ಚಾರಿಟೇಬಲ್ ಟ್ರಸ್ಟ್ ಅಡಿಯಲ್ಲಿ ಪ್ರಾರ್ಥನಾ ಆಂಗ್ಲ ಹಿರಿಯ ಪ್ರಾಥಮಿಕ ಮತ್ತು ಪ್ರೌಢ ಶಾಲೆಯಲ್ಲಿ ಶನಿವಾರ ಹಮ್ಮಿಕೊಳ್ಳಲಾಗಿದ್ದ ನೇತ್ರ ತಪಾಸಣೆ ಮತ್ತು ಶಸ್ತ್ರ ಚಿಕಿತ್ಸೆ, ಬೃಹತ್ ಆರೋಗ್ಯ ತಪಾಸಣೆ ಶಿಬಿರ ಉದ್ಘಾಟಿಸಿ ಮಾತನಾಡಿದ ಅವರು, ಆರೋಗ್ಯ ಶಿಬಿರ ಹಮ್ಮಿಕೊಳ್ಳುವ ಮೂಲಕ ಜನೋಪಯೋಗಿ ಕಾರ್ಯದಿಂದ ಸಮಾಜದ ಬಡವರಿಗೆ, ದುಬಾರಿ ವೆಚ್ಚದ ಚಿಕಿತ್ಸೆ ಪಡೆಯಲಾಗದವರಿಗೆ ಆರೋಗ್ಯ ತಪಾಸಣೆ ಶಿಬಿರ ವರದಾನವಾಗಿದೆ ಎಂದರು.
ಕುರಾಳ ಆಸ್ಪತ್ರೆಯ ಮುಖ್ಯ ವೈದ್ಯ ಡಾ.ಅಜಯ ಕುರಾಳ ಮಾತನಾಡಿ, ಚಿಕ್ಕ ಮಕ್ಕಳಿಗೆ ಚಹಾ, ಬ್ರೆಡ್, ಬೇಕರಿಗಳಲ್ಲಿನ ಆಹಾರ ಪದಾರ್ಥ ಕೊಡುವುದರಿಂದ ಮಕ್ಕಳ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರುತ್ತದೆ. ಮನೆಯಲ್ಲಿಯೆ ಸಿದ್ಧಪಡಿಸಿದ ಆಹಾರ ಕೊಡುವುದರಿಂದ ಮಕ್ಕಳ ದೈಹಿಕ ಮತ್ತು ಮಾನಸಿಕ ಆರೋಗ್ಯ ಸದೃಢಗೊಳ್ಳತ್ತದೆ ಎಂದರು.
ಕಂಬಳೇಶ್ವರ ಸಂಸ್ಥಾನ ಮಠದ ಸೋಮಶೇಖರ ಶಿವಾಚಾರ್ಯರು, ಸ್ತ್ರೀರೋಗ ತಜ್ಞ ವೈದ್ಯ ಡಾ.ಪಾರ್ವತಿ ಕುರಾಳ, ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಭೀಮಣ್ಣ ಸಾಲಿ, ಸಂಸ್ಥೆಯ ಅಧ್ಯಕ್ಷ ಜಗದೇವ ದಿಗ್ಗಾಂವಕರ್ ಮಾತನಾಡಿದರು.
ಈ ಸಂದರ್ಭದಲ್ಲಿ ಪ್ರಮುಖರಾದ ಸೋಮಶೇಖರ ಪಾಟೀಲ್ ಬೆಳಗುಂಪಾ, ಸೋಮಶೇಖರ ಹಿರೇಮಠ, ವಿಠಲ್ ವಾಲ್ಮೀಕಿ ನಾಯಕ, ಮಲ್ಲಿಕಾರ್ಜುನ ಮೋದಿ, ಸಿದ್ಧಲಿಂಗ ಸಾಹು ನಾಲವಾರ, ಭೀಮಾಶಂಕರ ಮೇಟಿಕರ್, ಮಲ್ಲು ಇಂದೂರು, ನಾಗರಾಜ ರೇಷ್ಮಿ, ವೀರಣ್ಣ ಸುಲ್ತಾನಪುರ, ವಿಶ್ವ ಟೋನಿ, ನೇಹಾಲ್ ಪಾಟೀಲ ಬೆಳಗುಂಪಾ, ಪ್ರಸಾದ್ ಅವಂಟಿ, ಬಸವಂತ ದಿಗ್ಗಾಂವಕರ್, ಮಹೇಶ ಬಾಳಿ, ಮನೋಹರ ಹಡಪದ ಸೇರಿದಂತೆ ಶಾಲೆಯ ಶಿಕ್ಷಕ ವೃಂದದವರು ಇದ್ದರು.
ಕಾರ್ಯಕ್ರಮವನ್ನು ಆರ್ ಸುಮನಾ ಸ್ವಾಗತಿಸಿದರು, ಭಾಗ್ಯಲಕ್ಷ್ಮಿ ನಿರೂಪಿಸಿದರು ಮತ್ತು ಪೌರ್ಣಮಿ ವಂದಿಸಿದರು.
ಶಿಬಿರದಲ್ಲಿ ಯಾದಗಿರಿಯ ವೇಧ ಕಣ್ಣಿನ ಆಸ್ಪತ್ರೆ, ಯುನೈಟೆಡ್ ಆಸ್ಪತ್ರೆ, ಕುರಾಳ ಮಲ್ಟಿ ಸ್ಪೇಷಾಲಿಟಿ ಆಸ್ಪತ್ರೆ, ಯಶೋಧಾ ಮಕ್ಕಳ ಆಸ್ಪತ್ರೆಯ ವೈದ್ಯರು ಮತ್ತು ವೈದ್ಯಕೀಯ ಸಿಬ್ಬಂದಿ ಶಿಬಿರದಲ್ಲಿ ಪಾಲ್ಗೊಂಡಿದ್ದ ಜನರ ಆರೋಗ್ಯ ತಪಾಸಣೆ ಮಾಡಿದರು. ಒಟ್ಟು 981 ಜನರ ಆರೋಗ್ಯ ತಪಾಸಣೆ ಮಾಡಲಾಯಿತು. 94 ಜನರ ನೇತ್ರ ಶಸ್ತ್ರ ಚಿಕಿತ್ಸೆಗೆ ಆಯ್ಕೆ ಮಾಡಲಾಯಿತು.
ಶಿಬಿರದಲ್ಲಿ ದಂತ ವೈದ್ಯೆ ಡಾ.ಪೂನಂ ವಾಗ್ಮೋಡೆ, ಡಾ.ಮಿರಾಜ್, ವೇಧ ಆಸ್ಪತ್ರೆಯ ವೈದ್ಯ ಡಾ.ನವನಿತಾ ರೆಡ್ಡಿ, ಡಾ.ವೆಂಕಟೇಶ ಮತ್ತು ಪಟ್ಟಣದ ಸರ್ಕಾರಿ ಆಸ್ಪತ್ರೆಯ ವೈದ್ಯಕೀಯ ಸಿಬ್ಬಂದಿಗಳು ಸೇರಿದಂತೆ ಒಟ್ಟು 30 ಜನ ವೈದ್ಯಕೀಯ ತಂಡ ಆರೋಗ್ಯ ತಪಾಸಣೆ ನಡೆಸಿದರು.
ಶಿಬಿರದಲ್ಲಿ ದೃಷ್ಟಿದೋಷವುಳ್ಳ 218 ಜನರಿಗೆ ಉಚಿತವಾಗಿ ಕನ್ನಡಕ ವಿತರಣೆ ಮಾಡಲಾಯಿತು, ಕಣ್ಣಿನ ಆರೋಗ್ಯ ಸಮಸ್ಯೆಯ 94 ಜನರಿಗೆ ಶಸ್ತ್ರ ಚಿಕಿತ್ಸೆ ಮಾಡಲು ಆಯ್ಕೆ ಮಾಡಲಾಯಿತು.
