ಅಡುಗೆಯಲ್ಲಿ ಬೆಣ್ಣೆಯ ಬಳಕೆ ಸಾಮಾನ್ಯ. ಬೆಳಗ್ಗೆ ತಿಂಡಿ, ರೊಟ್ಟಿ ಅಥವಾ ಇತರ ಖಾದ್ಯಗಳಲ್ಲಿ ಬೆಣ್ಣೆ ಹಚ್ಚಿ ಸವಿಯುವುದು ಎಲ್ಲರಿಗೂ ಇಷ್ಟ. ಆದರೆ ಅಂಗಡಿಯಲ್ಲಿ ಖರೀದಿಸುವ ಬೆಣ್ಣೆ ಗಟ್ಟಿಯಾಗಿರುವುದರಿಂದ ನೈಜ ರುಚಿ ಸಿಗುವುದಿಲ್ಲ. ಫ್ರಿಡ್ಜ್ನಲ್ಲಿ ತಿಂಗಳುಗಳ ಕಾಲ ಇಟ್ಟು ಬಳಸುವುದು ಸಹ ರುಚಿ ಕಡಿಮೆ ಮಾಡುತ್ತದೆ.
ಆದರೆ ನೀವು ನಿತ್ಯ ಖರೀದಿಸುವ ಪ್ಯಾಕೆಟ್ ಹಾಲಿನಿಂದಲೇ ಮನೆಯಲ್ಲಿ ತಾಜಾ ಬೆಣ್ಣೆ ತಯಾರಿಸಬಹುದು ಗೊತ್ತಾ ? ಹೇಗೆ ಅಂತ ನೋಡಿ.
ಸಾಮಾನ್ಯವಾಗಿ ಹಳ್ಳಿಗಳ ಕಡೆ ಹಸು, ಎಮ್ಮೆ ಹಾಲಿನಿಂದ ಬೆಣ್ಣೆ ಮಾಡುವುದನ್ನು ನೋಡಿರುತ್ತೆವೆ. ಆದರೆ ಪ್ಯಾಕೆಟ್ ಹಾಲಿನಿಂದಲೂ ಬೆಣ್ಣೆ ಮಾಡಬಹುದು ಗೊತ್ತಾ ? ಪ್ಯಾಕೆಟ್ ಹಾಲಿನಿಂದ ಒಂದು ತಿಂಗಳಿಗೆ ಸುಮಾರು ಒಂದು ಕೆ.ಜಿ ಮಾಡಬಹುದಂತೆ. ಆ ಸಿಂಪಲ್ ಟ್ರಿಕ್ ಇಲ್ಲಿದೆ ನೋಡಿ.
ಪ್ಯಾಕೆಟ್ ಹಾಲಿನಿಂದಲೆ ಸಿಗುತ್ತೆ ಕೆ.ಜಿ ಬೆಣ್ಣೆ
ನಂದಿನಿ ಅಥವಾ ಇತರ ಪ್ಯಾಕೆಟ್ ಹಾಲಿನಿಂದ ಕೆ.ಜಿ ಗಟ್ಟಲೆ ಬೆಣ್ಣೆ ಮಾಡಿ ಸವಿಯಬಹುದು. ಇದು ಸುಲಭ, ಆರೋಗ್ಯಕರ ಮತ್ತು ರುಚಿಕರ. ನಿಮಗೆ ಆರಾಮಗಿ ಮನೆಯಲ್ಲೆ ಬೆಣ್ಣೆ ಮಾಡಿ ಸವಿಯಬಹುದು. ಕಡಿಮೆ ಬಜೆಟ್ ಗೆ ನೀವು ದಿನನಿತ್ಯ ತರುವ ಹಾಲಿನಿಂದಲೇ ಬೆಣ್ಣೆ ಮಾಡಿ ತಿನ್ನಬಹುದು.
ಬೆಣ್ಣೆ ಮಾಡಲು ಬೇಕಾಗುವ ಹಾಲು ಯಾವುದು ?
ನೀಲಿ ಪ್ಯಾಕೆಟ್ನ ಸಾಮಾನ್ಯ ಹಾಲು ಬಳಸಬೇಡಿ, ಇದರಲ್ಲಿ ಕೆನೆ ಕಡಿಮೆ ಬರುತ್ತದೆ. ಬದಲಿಗೆ ಕೆಂಪು ಬಣ್ಣದ ಶುಭಂ ಅಥವಾ ಹೋಮೋಜಿನೈಸ್ಡ್ ಟೋನ್ಡ್ ಹಾಲು ಬಳಸಿ. ಅರ್ಧ ಲೀಟರ್ ಅಥವಾ ಹೆಚ್ಚಿನ ಪ್ರಮಾಣದ ಹಾಲು ತೆಗೆದುಕೊಳ್ಳಿ. ಒಂದು ತಿಂಗಳ ಕಾಲ ಕೆನೆ ಸಂಗ್ರಹಿಸಿ ಬೆಣ್ಣೆ ತಯಾರಿಸಬಹುದು.
ಕೆನೆ ಸಂಗ್ರಹಿಸುವ ವಿಧಾನ
- ಮೊದಲು ಹಾಲನ್ನು ಪಾತ್ರೆಗೆ ಹಾಕಿ ಒಲೆ ಮೇಲಿಟ್ಟು ಕುದಿಯಲು ಬಿಡಬೇಕು. ಇದಕ್ಕೆ ನೀರು ಹಾಕದೆ ಕುದಿಸಬೇಕು. ಕುದಿಬರುವ ಮುನ್ನ ಒಮ್ಮೆ ಹಾಲನ್ನು ಮಿಕ್ಸ್ ಮಾಡಬೇಕು. ಹಾಲು ಕುದಿಬರಲು ಆರಂಭಿಸಿದಾಗ ಸಣ್ಣ ಉರಿಯಲ್ಲಿ ಇಟ್ಟು ಮತ್ತೆ 5 ನಿಮಿಷ ಕುದಿಬರಲು ಬಿಡಬೇಕು. ನಂತರ ಒಲೆ ಆಫ್ ಮಾಡಿ ಕೆಳಗೆ ಇಳಿಸಿಕೊಂಡು ತಣ್ಣಗಾಗಲು ಬಿಡಿ.
- ಸ್ವಲ್ಪ ತಣ್ಣದಾಗ ಬಳಿಕ ಇದನ್ನು ಮುಕ್ಕಾಲು ಭಾಗ ಮುಚ್ಚಳದಿಂದ ಮುಚ್ಚಿ ಫ್ರಿಡ್ಜ್ನಲ್ಲಿಡಿ. ಸುಮಾರು 6ರಿಂದ 7 ಗಂಟೆಗಳ ಕಾಲ ಫ್ರಿಡ್ಜ್ನಲ್ಲಿ ಇಡಬೇಕು. ಅದರಲ್ಲಿ ಕೆನೆ ಬರಲು ಆರಂಭಿಸಿದಾಗ ಯಾವುದೆ ಕಾರಣಕ್ಕೂ ಕೆನೆಯನ್ನು ಅಲುಗಾಡಿಸುವುದು, ಮಿಕ್ಸ್ ಮಾಡುವ ಕೆಲಸ ಮಾಡಬೇಡಿ. ಹಾಲು ತೆಗೆಯುವಾಗ ನಿಧಾನವಾಗಿ ಒಂದು ಬದಿಯಲ್ಲಿ ಮಾತ್ರ ಹಾಲನ್ನು ತೆಗೆದು ಕೆನೆಯನ್ನು ಹಾಗೆ ಬಿಡಿ.
- ನಂತರ ದಪ್ಪವಾಗಿ ಬಂದಿರುವ ಕೆನೆಯನ್ನು ನಿಧಾನವಾಗಿ ತೆಗೆದು ಒಂದು ಡಬ್ಬಿಯಲ್ಲಿ ಹಾಕಿ ಫ್ರಿಡ್ಜ್ನಲ್ಲಿ ಇಡಬೇಕು. ಇದೆ ರೀತಿ ಒಂದು ತಿಂಗಳ ಕಾಲ ಕೆನೆಯನ್ನು ಹಾಲಿನಿಂದ ಬೇರ್ಪಡಿಸಿ ಈ ಡಬ್ಬಿಯಲ್ಲಿ ತುಂಬಿಸುವ ಕೆಲಸ ಮಾಡಿ. ಒಂದು ತಿಂಗಳಿಗೆ ಬಹಳಷ್ಟು ಕೆನೆ ಸಂಗ್ರಹವಾಗಿರುತ್ತದೆ.
ಬೆಣ್ಣೆ ಮಾಡುವ ವಿಧಾನವೆನು ?
- ಈಗ ನೀವು ಸಂಗ್ರಹಿಸಿಟ್ಟಿರುವ ಕೆನೆ ತೆಗೆದುಕೊಳ್ಳಿ. ಒಂದು ದೊಡ್ಡ ಪಾತ್ರೆಯಲ್ಲಿ ಎಲ್ಲವನ್ನು ಹಾಕಿ ಪಾತ್ರೆಯ ತಳದಲ್ಲಿ 2ರಿಂದ 3 ಸ್ಪೂನ್ ಮೊಸರು ಹಾಕಿ. ನಂತರ ಎಲ್ಲಾ ಕೆನೆ ಇದಕ್ಕೆ ಹಾಕಿ. ನಂತರ ಇದನ್ನು 1 ಗಂಟೆ ಹಾಗೆಯೆ ಬಿಡಿ. ಈಗ ಈ ಕೆನೆ ಮುಚ್ಚುವಷ್ಟು ನೀರು ಹಾಕಿಕೊಂಡು ಸೌಟಿನಿಂದ ಮಿಕ್ಸ್ ಮಾಡಿಕೊಳ್ಳಿ. ಸ್ವಲ್ಪ ತೆಳುವಾಗಬೇಕು. ಈಗ ಕುಡುಗೂಲಿನ ರೀತಿಯಲ್ಲಿ ಮಿಕ್ಸರ್ ಬಳಸಿಕೊಂಡು ತಿರುಗಿಸಿಕೊಳ್ಳುತ್ತಾ ಇರಬೇಕು.
- ಸುಮಾರು 15ರಿಂದ 20 ನಿಮಿಷ ಮಿಕ್ಸ್ ಮಾಡಿಕೊಳ್ಳುತ್ತಾ ಇದ್ದರೆ ಬೆಣ್ಣೆ ಬರಲು ಆರಂಭಿಸುತ್ತದೆ. ನಂತರ ಕೈ ನೆನೆಸಿಕೊಂಡು ಬೆಣ್ಣೆಯನ್ನು ನಿಧಾನವಾಗಿ ತೆಗೆದು ಉಂಡೆ ಕಟ್ಟಿಕೊಳ್ಳಿ. ಇಷ್ಟಾದರೆ ನಿಮ್ಮ ಮುಂದೆ ಬೆಣ್ಣೆ ಮುದ್ದೆ ರೆಡಿಯಾಗಿರುತ್ತದೆ. ನೀವು ಸಹ ಈ ಪ್ಯಾಕೆಟ್ ಹಾಲಿನಲ್ಲಿ ಬೆಣ್ಣೆ ಮಾಡಬಹುದು. ಈ ಬೆಣ್ಣೆಯನ್ನು ಫ್ರಿಡ್ಜ್ನಲ್ಲಿ ಇಟ್ಟು 1ವಾರದೊಳಗೆ ಇದನ್ನು ತುಪ್ಪ ಮಾಡಿಕೊಳ್ಳಿ.
ಹೀಗೆ ನಿಮ್ಮ ಮನೆಯಲ್ಲಿಯೇ ತಾಜಾ ಬೆಣ್ಣೆ ಸಿದ್ಧ. ಇದನ್ನು ಫ್ರಿಡ್ಜ್ನಲ್ಲಿ ಇಟ್ಟು 1 ವಾರದೊಳಗೆ ತುಪ್ಪ ಮಾಡಿಕೊಳ್ಳಬಹುದು. ಮನೆಯಲ್ಲಿ ಮಾಡಿದ ಬೆಣ್ಣೆ ರುಚಿ ಮತ್ತು ಆರೋಗ್ಯದ ದೃಷ್ಟಿಯಿಂದ ಉತ್ತಮ. ಅಂಗಡಿ ಬೆಣ್ಣೆಗಿಂತ ತಾಜಾ ಮತ್ತು ನೈಸರ್ಗಿಕ. ಈ ವಿಧಾನ ಸುಲಭ ಮತ್ತು ಯಾರು ಬೇಕಾದರೂ ಮಾಡಬಹುದು. ಪ್ಯಾಕೆಟ್ ಹಾಲು ಬಳಸಿ ಬೆಣ್ಣೆ ತಯಾರಿಸಿ ಕುಟುಂಬಕ್ಕೆ ರುಚಿಕರ ಖಾದ್ಯ ನೀಡಬಹುದು.
