ಇತ್ತೀಚೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ಒಂದು ವಿಡಿಯೋದಲ್ಲಿ, ಐಸ್ ನೀರಿನಿಂದ ತುಂಬಿದ ಬಾಟಲಿಯನ್ನು ಕಾಲಿನ ಕೆಳಗೆ ಇಟ್ಟು ರೋಲ್ ಮಾಡಿದರೆ ಕಾಲು ನೋವು ಅಥವಾ ಪಾದದ ನೋವು ಕಡಿಮೆಯಾಗುತ್ತದೆ ಎಂದು ಹೇಳಲಾಗುತ್ತಿದೆ. ವೈದ್ಯರು ಹೇಳುವ ಪ್ರಕಾರ, ಇದು “ಕೋಲ್ಡ್ ಥೆರಪಿ” ಮತ್ತು ಮಸಾಜ್, ಎರಡರ ಸಂಯೋಜನೆಯಂತೆ ಕೆಲಸ ಮಾಡುತ್ತದೆ. ಐಸ್ನ ತಂಪು ಕಾಲಿಗೆ ತಾಗಿದಾಗ ಆ ಭಾಗದ ರಕ್ತನಾಳಗಳು ತಾತ್ಕಾಲಿಕವಾಗಿ ಸಂಕೋಚಗೊಳ್ಳುತ್ತವೆ. ಇದರಿಂದ ಊತ ಮತ್ತು ಉರಿಯೂತ ಕಡಿಮೆಯಾಗಲು ಸಹಾಯವಾಗುತ್ತದೆ. ಜೊತೆಗೆ ತಂಪಿನಿಂದ ನರಗಳು ಸ್ವಲ್ಪ ಕೂಲ್ ಆಗುವುದರಿಂದ ನೋವಿನ ಸಂದೇಶಗಳು ಮೆದುಳಿಗೆ ಕಡಿಮೆ ಪ್ರಮಾಣದಲ್ಲಿ ಸಾಗುತ್ತವೆ. ಪರಿಣಾಮವಾಗಿ ತಕ್ಷಣದ ಆರಾಮ ಸಿಗಬಹುದು. ಆದರೆ ಯಾವ ರೀತಿ ನೋವಿದ್ದವರಿಗೆ ಉಪಯುಕ್ತ, ಎಲ್ಲರೂ ಬಳಸಬಹುದೇ, ಯಾವ ರೀತಿ ಎಚ್ಚರಿಕೆ ವಹಿಸಬೇಕು ಎಂಬುದನ್ನು ಸ್ಟೋರಿ ಮೂಲಕ ತಿಳಿದುಕೊಳ್ಳಿ.
ವಿಶೇಷವಾಗಿ ಪ್ಲಾಂಟರ್ ಫ್ಯಾಸಿಯಾಟಿಸ್ ಅಥವಾ ಪಾದದ ತಳಭಾಗದ ನೋವಿನಿಂದ ಬಳಲುವವರಿಗೆ ಈ ವಿಧಾನ ಉಪಯುಕ್ತವಾಗಬಹುದು. ಬಾಟಲಿಯ ಗೋಲಾದ ಆಕಾರವು ಪಾದದ ಸ್ನಾಯುಗಳನ್ನು ಮೃದುವಾಗಿ ಸ್ಟ್ರೆಚ್ ಮಾಡುವಲ್ಲಿ ಸಹಕಾರಿ. ದಿನಪೂರ್ತಿ ನಿಂತು ಕೆಲಸ ಮಾಡುವವರು ಅಥವಾ ಹೆಚ್ಚು ನಡೆಯುವವರಿಗೂ ಇದು ಸ್ವಲ್ಪ ಮಟ್ಟಿನ ಪರಿಹಾರ ನೀಡಬಹುದು.
ಯಾರಿಗೆ ಅಪಾಯಕಾರಿ ?
ಈ ವಿಧಾನ ಬಳಸುವಾಗ ಕೆಲವು ಮುನ್ನೆಚ್ಚರಿಕೆಗಳು ಅಗತ್ಯ. ಐಸ್ ಬಾಟಲಿಯನ್ನು ನೇರವಾಗಿ ಚರ್ಮದ ಮೇಲೆ ರೋಲ್ ಮಾಡಿದರೆ “ಫ್ರಾಸ್ಟ್ ಬೈಟ್” ಅಥವಾ ಚರ್ಮ ಹಾನಿಯಾಗುವ ಸಾಧ್ಯತೆ ಇದೆ. ಆದ್ದರಿಂದ ಸಾಕ್ಸ್ ಧರಿಸುವುದು ಅಥವಾ ಬಾಟಲಿಗೆ ಸಣ್ಣ ಬಟ್ಟೆ ಸುತ್ತುವುದು ಉತ್ತಮ. ಒಂದೆ ಬಾರಿ 10 ರಿಂದ 15 ನಿಮಿಷಕ್ಕಿಂತ ಹೆಚ್ಚು ಕಾಲ ಈ ವಿಧಾನವನ್ನು ಬಳಸಬಾರದು. ಮಧುಮೇಹ, ನರಗಳ ದುರ್ಬಲತೆ ಅಥವಾ ರಕ್ತಪ್ರಸರಣ ಸಮಸ್ಯೆ ಇರುವವರು ವೈದ್ಯರ ಸಲಹೆಯಿಲ್ಲದೆ ಇದನ್ನು ಪ್ರಯತ್ನಿಸಬಾರದು. ಏಕೆಂದರೆ ಇವರಿಗೆ ತಂಪಿನ ಪರಿಣಾಮ ಹೆಚ್ಚಾಗುವ ಸಾಧ್ಯತೆ ಇರುತ್ತದೆ.
ಒಟ್ಟಾರೆ, ಐಸ್ ವಾಟರ್ ಬಾಟಲ್ ರೋಲಿಂಗ್ ಸಾಮಾನ್ಯ ಕಾಲು ನೋವು ಮತ್ತು ದಣಿವಿಗೆ ತಾತ್ಕಾಲಿಕ ಪರಿಹಾರ ನೀಡುವ ಸರಳ ವಿಧಾನವಾಗಿದೆ. ಆದರೆ ನೋವು ಹಲವು ದಿನಗಳವರೆಗೆ ಮುಂದುವರಿದರೆ ಅಥವಾ ತೀವ್ರವಾಗಿದ್ದರೆ, ಫಿಸಿಯೋಥೆರಪಿಸ್ಟ್ ಸಂಪರ್ಕಿಸುವುದು ಅತ್ಯಗತ್ಯ.
